Ko e tumutumu ‘o e feohi mo e tauhi vaha’angatae ‘o e kaume’a ‘a ha fefine mo ha tangata; ko e sila’i kinaua ‘e he fuakava ‘o e mali kae ‘oua kuo vete kinaua ‘e he mate. Ka ‘i he tui ‘a e fa’ahinga; koe sila’i kinaua ‘e ha tokotaha ma’u mafai totonu ’i ha feitu’u totonu ‘i he mo’ui ni pea moe mo’ui kaha’uu. ‘Io, ko e mo’oni ‘oku hoko ‘a ‘ete ta’e tauhi ‘ae fuakavá koe tukia’anga ki he fa’u'anga ‘oe familí. ’Oku ‘uhinga nai ‘eni ke to’o ai ‘ae mali fakalao moha fakakakato ‘e ha Siasi Fakakalisitiane? ‘Oku totonu nai ke liliu ‘a e ngaahi founga ke fa’u'aki ha ngaahi famili fo’ou? ‘Oku ou tui ‘e ‘iai ‘ae tali ‘ae tokotaha kotoa pe. Ka ko ia ‘oku ‘aonga kiate KOE pea ke tokanga ke tanumaki mo fakahoko ia!
Koe ngaahi vaa’ihala faingata’a ki he kumi ‘a hoto ’ofa’angá. He ko e fononga he toafa ‘oku fonu ‘i he faingata’a ‘o fepaki fakaēnatula mo e ngaahi vā fakaētangata. ‘Ilonga ‘akinaua ‘e tuia ‘a e ngaahi kinoha’a ‘o e fe’ofa’aki ‘a kakau mo katekina ke kavekavea’u ’o mahulu he ‘ofa lau.
‘Oku fakakakato ‘a e ngaahi ouau mali ‘o onopooni ‘a e ngaahi tukufakaholo ‘o tulifua he lotu mo e ako ‘ene kei talamuka. Ko e founga ‘o e ‘eva ‘aha tangata ki ha fefine pea moe mali faka-tongá. ’E fakahoko ‘a e ‘eva ‘a e tangata he faikava mo e talanoa he loto fale ‘o e fefiné. Kapau ‘e ōfea ‘a e loto ‘o e fefiné ke hoko ‘a e tangata ko hono husepaniti, ‘e lele atu leva ‘a e tangatá mo e konga hono kāingá ‘o fakahoko ‘a e faitohi ki he fefiné. Kapau ‘e tali ‘e he kāinga mo e famili ‘o e fefiné, pea ‘e teuaki leva ‘a e malí. Ka fakahoko ‘a e malí kimui ‘i Tisema, ‘oku fa’a fakahoko leva heni ‘a e me’a ko e ‘ave kaati faka-tonga ‘a e tangata ki he fefiné. ‘Oku fa’a tali’aki ‘a e kaati ‘a e ngaahi koloa faka-tonga mo e ngaahi me’a teuteu ki he tangatá. (Mahalo pe ko e me’a ‘eni ‘oku fa’a lahi ai ‘a e ngaahi mali kimu’a he tapuni ‘a e pule’angá ‘i Tisema, ’a ia ‘oku fa’a a’u kihe mali ‘e 30 tupu he ‘aho!)
FAKALELEA ‘O E MALÍ
‘Oku fakahoko ‘a e fakalelea ‘o e malí he pō’uli hifo kimu’a pea fakahoko e ‘aho malí. ‘Oku fononga atu ai ‘a e tangatá mo hono kāingá ki he ‘api nofo’anga ‘o e fefiné. ‘Oku lahi ‘a e ngaahi me’a moe naunau ki he fakatu’uta ki he ‘api nofo’anga ’o e fefiné; ‘aia ‘oku fakahoko kotoa pe ia ‘ehe famili ‘oe tangatá. ‘Oku lahi fakahoko pe ‘a e ngaahi hiva, tau’olunga, mo e ngaahi fakapale ko e faka’ilonga’i pe ‘o e teu katoangá mo e loto ‘oku fonu ‘i he fiefiá. ‘Oku ‘i he tangatá mo e kāinga ‘o e fefine pe ‘a e ngalutuku ‘o e fakaleleá mo hono veteange ‘o e feohi’angá.
‘AHO MALI
Ko e angamaheni ‘oku taki taha teuteu pe ‘akinaua ‘oku teu malí ‘i hona takitaha ‘api nofo’anga. ’E lele atu ‘a e tangata ki he ‘api nofo’anga ‘o e fefine ‘o tataki mai ‘e he tangata ‘a e fononga ki he ‘Ofisi ‘o e Failesisita ‘a e Pule’angá, ‘a ia ‘oku na takitaha heka pe he’ena me’alele.
‘Oku tomu’a fakahoko ‘a e ngaahi ngāue ‘a e Failesisita ‘a e Pule’angá ki he’enau ngaahi lekooti ki he malí. ‘I he lava lelei ‘a e ngaahi fiema’u mei he ‘Ofisi ‘o e Failesisita ‘o e Pule’angá, ‘oku hoko atu ai ki he ngaahi ouau ‘a e Siasí kae toki kakato mo fakalao.
‘Oku hoko ‘a e ‘aho malí ko e katoanga mo e kai me’akai fakafiefia ‘a e ongo familí, kāingá, mo e ngaahi mahení.
‘AHO SAPATE
Ko e teuteu ki he lotú ‘oku fakahoko pe ia he ongo famili fā’e ‘a e ongo me’a malí he ‘api nofo’anga ‘o e tangatá. Ko e fuofua teunga ki he lotu ‘oku kumi ‘ia ‘e he famili ‘o e tangatá.
Ko e ‘ata ‘eni ‘o e ongo me’a malí mo e ongo fā’ehukí. Na’e ha’u pe ‘a e tangata ki he tangata mo e fefine ki he fefine mei he ongo kāingá ke fakahoko ‘a e fatongiá. Koe fā’ehukí koe kainga tu’a ia ki he takitaha fa’e ‘ae ongo me’a malí . Ko e ‘aho ‘eni ’oku feime’atokoni ai ‘a e famili moe kāinga ‘o e tangata malí. Koe anga mahení ‘oku fakahoko ‘eha fakafofonga mei he ongo famili ‘ae lea lolotonga e ma’u me’atokoni ‘o e ‘uluaki Sapaté. Ko e taha ‘o e koloa mahu’inga ‘o e ‘ahó, ko ha vahevahe ‘a e ongome’a ‘a naua ‘a e ‘ahó.
Tu’a ‘Ofa ‘Eiki Atu.
FA’U: Kisione Taufa
Taimi: 9 : 00 am (Tonga Time)
‘Aho: 25 Sanuali 2007
Feitu’u: Tonga
